ma-bap ne bhulsho nahi..મા-બાપને ભૂલશો નહીં Bhajan lyrics in gujarati

ભૂલો ભલે બીજું બધું મા-બાપને ભૂલશો નહી

અગણિત છે ઉપકાર એના, એહ વિસરશો નહી

ભૂલો ભલે બીજું .........

અસહ્ય વેઠી વેદના, ત્યારે દીઠું તમ મુખડું

એ પુનિત જનના કાળજાં, પથ્થર બની છૂંદશો નહી

ભૂલો ભલે બીજું .........

કાઢી મુખેથી કાળિયા, મોંમા દઈ મોટા કર્યા

અમૃત તણા દેનાર સામે, ઝેર ઉછાળશો નહી

ભૂલો ભલે બીજું .........

લાખો લડાવ્યા લાડ તમને, કોડ સહુ પુરા કર્યા

એ કોડના પૂરનારના, કોડ પૂરવા ભૂલશો નહી

ભૂલો ભલે બીજું .........

લાખો કમાતા હો ભલે, માબાપ જેથી ના ઠર્યા

એ લાખ નહિ પણ રાખ છે, એ માનવું ભૂલશો નહી

ભૂલો ભલે બીજું .........

સંતાનથી સેવા ચહો, સંતાન છો સેવા કરો

જેવું કરો તેવું ભરો, એ ભાવના ભૂલશો નહી

ભૂલો ભલે બીજું .........

ભીને સૂઈ પોતે અને સૂકે સૂવાડ્યા આપને

એની અમીમય આંખને, ભૂલીને ભીંજવશો નહી

ભૂલો ભલે બીજું .........

પુષ્પો બિછાવ્યાં પ્રેમથી, જેણે તમારા રાહ પર

એ રાહબરના રાહ પર, કંટક કદી બનશો નહી

ભૂલો ભલે બીજું .........

ધન ખરચતાં મળશે બધું, માતાપિતા મળશે નહી

એનાં પુનિત ચરણો તણી, કદી ચાહના ભૂલશો નહી.

ભૂલો ભલે બીજું .........

Bhajan Gazal Lyrics